Introduzione Generale a "S' Impostura Clericale"

"Sa Dezisiones de Peppeddu Cau de Dualchi -a segundu su modestu ma imparziale criteriu meu- sunu una vera opera de arte poetica sarda, e dai su latu morale giudico s'espressione de s'autore sa pius moderata, sinzera e zivile, tantu chi diada esser bene pro su populu sardu chi tale educazione li esserede impartida, pro s'isvinculare dai cuddas credenzias superstiziosas e falzas, insinuadas cun artes malignas de chie s'ignoranzia propagada e isfruttada, cun sa ruina morale e materiale de sos poveros trabagliadores.
Como de pagu, mi est capitadu unu liberu intituladu: Poesias Criticas de Giuanne Farris de Usini, cun s'aggiunta de sa Noa Poesia contra sas Dezisiones fatta dai s'incupetente(!) Peppeddu Cau de Dualchi.
Propriu custa aggiunta noa mi hada fattu dezidere de legger su liberu chi in zertos puntos mi faghede una sensazione tale, de mi ezzitare a su puntu de narrer: e-i custa est sa religione cattolica apostolica romana?! E-i custa est s'espressione de unu cattolicu puru sanbene militante? E tra me riflettende, e dende una mirada a su passadu, bido chi cantu Farris iscriede, est sa vera cunfirma de su chi est religione e religiosu cattolicu, ossiada confirmada chi sa religione cattolica apostolica romana est un'arte de simulasiones dellituosas, un'arte infangada in su pius brutale, vile e barbaru operare, in d'una arte chi pro base apparente sua hada perdonu, s'amore, s'umilidade, ma custa apparenzia est unu velu 'e ipocrisia chi cuada sa vinditta sa pius atroce, sa superbia sa pius isfrenada, s'odiu implacabile chi accumpagnada sa vittima finza a sa morte. Ma essende goi sas cosas -nesi puru- si finzas a oe, pro ingenuidade o pro culpa de sos... mastros incoscentes o falzos chi m'hana educadu gai, so istadu in su numeru de sos... cattolicos apostolicos romanos, dai custu momentu rinunzio cun tanta repugnanzia a su postu chi occupaia in cussa classe mista de... anzones e de lupos.

Est Giuanne Farris, chi in s'opera poetica sua mi hada lassadu trasparire cantu sa religione cattolica cuntenidi de velenu e de impostura, anzis hada cherfidu dimustrare luminosamente chi sa religione, ossiada sa Chegia-Cattolica, no est atteru che un'officina de dellitos sos pius barbaros.
Est una proa sa pius giara cando Farris trattada de gherras sambenosas chi sa chegia hada sustennidu contra de sos pretesos ereticos, e de milli vittorias chi sos pabas hana ottennidu cun agiudos de regnantes tirannos, pro recumpensa beneittos, incoronados e santificados.

E mentre chi cuddu Cristos gherraiada cun s'amore, cun su perdonu e cun sa persuasione de su bene, sos pabas, cuddos bezzos benefattores de s'umanitade, comente los giamada Farris, gherraiana cun ispadas e piumbu pro su bene temporale, e pro salvare sos corpos insoro, dai sa vinditta de sos populos isciaos.

Farris narada chi Gesù Cristo mastru modellu, fundesidi sa chegia sua in sa persone de S.Pedru, rappresentada, pro una serie mai interrotta de deghennoe seculos, dai sos romanos pontefizes e piscamos cattolicos, e chi sa chegia de Gesù Cristu est fidele custodia de sa fide e de sa morale.

Ma Farris pro narrer tottu custu senza azzuppare in logu, forsi hada contadu in sos seguaces e rappresentantes de unu Cristos umile, chi morzesidi in d’ una rughe perdonende sos suos crucifissores, sos seguentes pontefizes apostolicos romanos,chi sos pius si sunu innalzados a sos altares pari pari.