Movente de s' opusculu

A Su Lettore

Movente de s’ opusculu

Giuanne Farris de Usini, in sa segunda edissione de Poesias Criticas (1904) contro de Antoni Dominigu Migheli de Osilo, cun s’ aggiunta de una Noa Poesia, contro s’ incumpetente (!) Peppeddu Cau de Dualchi, pro sas suas Dezisiones, in sa pagina 124 narada:

“Su lettore in s’ imparziale giudisciu sou, hada a dichiarare chie de sos duos, Cau o eo, happada raione”.

E deo eccitadu dai su limbazzu de Farris, e poi bidende ch’ isse hada lassadu passu liberu a su lettore de fagher unu imparziale giudisciu de s’ opera, sua cherfesi sacrificare porzione de tottu sas oras destinadas a su nezzessariu reposu (chi pro sa vida operaia sunu indispensabiles ) de circa tres annos, e cun tantos sacrifizios servendemi de fattos istoricos e iscientificos, presento cantu sighidi.

E si legges lettore attentamente,

E chi t’ aggiadat cust’ opera mia,

Sa prosa, cun s’ intera poesia…

Ti naro chi ‘nde so indifferente:

E si no t’ aggraderet totalmente,

Si m’ iscultas, ti naro solu ebbìa.

De ti la fagher tue una cantone

Ch’ aggradet a sa tua…opinione.

AVVERTENZIA !

Su suttiscrittu criticada solamente sas credenzias religiosas e politicas chi cuntenidi s’ opusculu de Giuanne Farris, e dichiarada in modu assolutu de non haere sa minima idea de offesa contro sa vida de su matessi Farris, essende dai su suttiscrittu isconnoschida.

Solu iscopu de su presente trattadu est de criticare generalmente s’ idea religiosa e pulitiga de su “Clericalismu”, manifestende massimu rispettu pro sas personas a cale si siat classe ch’ appartrenzana in religione e in pulitiga.

Angelo Dore

Ittiri, 1 maggio 1909